Kas   •   Tokante Fundashon Forma   •   Notisia   •   Tim   •   Kontakto   
Palabranan di nos direktor Sra. Inge Berben:
 

Un aña nobo, metanan nobo, un mira nobo! Den e tres ultimo añanan tabata klaro ku tin un nesesidat enorme pa edukashon pa adulto aki na Boneiru. Den mart 2006 FORMA tabata traha pa 34 kursista, den aña 2009 un kantidat di 303 adulto a sigui un trayekto, kurso òf estudio na FORMA.

 

E kresementu enorme aki i e variashon den posibilidatnan di estudio a trese hopi kambio pa e organisashon. Asina tantu ku aktualmente nos no ta pas mas den e edifisio kaminda nos ta operá na Kaya Korona. Den aña 2009 porfin nos a kuminsá ku e prome fase di renobashon di e edifisio di kas di sosiegu bieu di Fundashon Mariadal. Entrante 26 di yanüari 2009 e edifisio aki lo wòrdu renobá i partí den ofisinanan, kamber di konsulta, i 6 lokal pa duna lès. Tur esaki ku fondonan di USONA. Ta planeá pa muda pa e parti aki den oktober 2010.

 

Den fase 2 e renobashon di e lokalnan di práktika lo tuma lugá. Esaki lo konsistí di un lokal pa elektrotéknika, un lokal pa konstrukshon, i pa e departamentu di Horeka un kushina profeshonal ku panaderia, restorant i bar. Tur fasilidat huntu!

 

Esaki no solamente lo tin efekto riba e maneho di e organisashon, pero lo duna un empuhe pa halsa e kalidat di enseñansa i e kalidat di kuido i guia pa e kursistanan.

 

E tim di FORMA en todo kaso ta hopi entusiasmá! Nos ta spera di por invitábo na e apertura di e edifisio nobo aki den oktober 2010!

 

Inge Berben

Direktor FORMA

 
* -*
 
FORMA ta un fundashon pa edukashon pa adulto na Boneiru.
 
Meta
FORMA ta un instituto ku ta para responsabel pa duna edukashon riba un nivel haltu. Nos ta duna kada partisipante e oportunidat pa desaroyá na su nivel i den su area di interes. Nos ta krea oportunidat pa e partisipante por desaroyá.
Nos ta kumpli ku e meta dor di duna kada kursista un perspektiva personal. Despues ku nan a kaba ku kurso òf trayekto di traha i siña nan tin:
  • Sufisiente abilidatnan sosial i komunikativo
  • Un aktitut positivo tokante trabou
  • Nan por resolvé problemanan òf sa na unda nan por bai si tin problema
  • Nan ta dominá un fishi.
Riba e wepsait aki bo por haña diferente informashon over di Fundashon FORMA.
E balki oraño ariba ta duna informashonnan general. E botónnan blou na links ta duna informashon di e departamentunan i proyektonan di FORMA.
 
 
Studiantenan di SBO Konstrukshon a drenta fase final di estudio.

Den luna di aprel 2010 7 studiante di SBO Konstrukshon a drenta periodo 3 di nan estudio. Esaki alabes ta e delaster periodo den kual nan tin ku finalisa nan periodo di stazje i tambe traha riba nan materianan teoretiko i praktiko.

 
(11-04-2010)
>>>
Training básiko pa guia di stazje a kuminsa.

Fundashon FORMA huntu ku kenniscentrum Calibris di Hulanda a kuminsa ku un training pa siña guia studiantenan durante di nan periodo di stazje. E training aki ta wòrdu duná dor di un trainer profeshonal di e kenniscentrum Calibris.
E training aki ta basá riba un método pa siña, guia i evaluá studiantenan den nan periodo di stazje teniendo kuenta ku e kompetensianan ku e studiantenan mester desaroyá.

(07-04-2010)
>>>
Developed with QwikZite (version 1.12)  Designed by Kuki & Ko