E kurso ta konsistí di tres (3) nivel.
Ta trata di personanan ku sa masha poko òf niun lèter i ku tin masha poko òf niun dominio riba e prinsipionan básiko di lesa i skibi. Nan mester logra por lo ménos: skibi nan personalia i lesa funshonal.
Ta trata di personanan ku konosé bastante lèter i ku mester halsa nan nivel di lesamentu i skibimentu.
Ta trata di personanan ku por lesa i skibi, pero nan mester perfekshoná e abilidatnan aki.
Promé tin un kombersashon / inskripshon, pa determiná nivel di kada kursista.
Despues ta start e lèsnan: 2 bes pa siman anochi tin un ora i mei di lès.
Kada grupo ta konsistí di maksimal 5 kursista.
Kada kurso ta dura 10 luna i na final di e kurso kada kursista ta risibí un sertifikado.
Ta tene un kombersashon ku kada persona; ta saka kopia di su sédula i ta yena un formulario di enkuesta durante di e kombersashon.
Despues ta hasi e tarea di kapasitashon:
Nivel 1 i 2 ta haña un karchi ku tur lèter pa nan lesa. Dependé e resultado di esaki, nan ta haña un teksto pa nan lesa.
Nivel 3 ta haña un karchi ku tur lèter pa nan lesa, un kombinashon di ehersisio pa traha i un teksto pa lesa.
Regularmente dosentenan ta traha material pa uza durante di nan lèsnan. Tambe tin un tim ku ta desaroyando paketenan di lès: ta trata temanan di gran importansia pa e kursistanan.
Por ehèmpel: oloshi, konta sèn i sa balor di sèn, nos alfabèt repartí den vokal, konsonante etc., dia di Boneiru, tarheta di identifikashon. I asina tin hopi mas.
Kordinadó di proyekto
E kordinadó di e departamentu di Alfabetisashon ta Sra. Xiomara Frans-Muller. E ta maestra di skol ku a traha18 aña den Enseñansa Spesial, 3 aña den skol básiko, 1 aña den SGB i 1 aña den ‘S & W’( ‘Scholing en Werk’, un proyekto di FORMA ku awor yama ‘Sociale Vormingsplicht’ ).
Tambe el a sigui diferente kurso pa halsa su konosementu en general komo maestra, pero en partikular pa ku personanan mentalmente retardá, pa yuda nan yega na lesa i skibi na nan nivel.
Tur dia nos tin momentonan impreshonante den un òf mas di nos gruponan: desaroyo chikitu den e lesamentu. Tambe nos tin enkuentronan na unda tur nos kursistanan ta huntu: tin un ambiente hopi alegre i ku rèspèt pa otro.
Den e siman di 11 di yüni 2007, dos kursista di e departamentu di Alfabetisashon a optené nan reibeweis. Hubert Beukenboom a pasa e eksamen práktiko djamars 12 di yüni i Victoriano a hasi esaki djarason 13 di yüni último. Pa e kursistanan ta un meta realisá di hopi aña. Mayoria di e kursistanan aki a bai pasa e èksamen aki na mas ku un okashon. Pa e departamentu tambe esaki ta un logro hopi grandi.
