SBO na FORMA kiko esaki ta?
FORMA ta duna enseñansa riba nivel sekundario pa personanan adulto ku a kai for di e enseñansa regular. Si bo no a terminá bo skol básiko ku un diploma òf bo a stòp na mitar kaminda i ta deseá di kuminsá di nobo, FORMA ta dunabo e oportunidat pa siña un fishi siguiendo enseñansa sekundario di fishi (SBO).
Pa yega na un pakete di kurso semper FORMA ta sondia e merkado i konforme e nesesidat di merkado na e momento ei FORMA ta ofresé diferente fishi pa kursistanan. SBO ta duna kurso pa e siguiente fishinan:
- Asistente di Horeca
- Asistente di konstrukshon
- AKA kual ta Arbeidsgekwalificeerd Assistent. Esaki ta un estudio general ku ta prepará riba diferente funshon riba nivel 1.
Pa ken SBO ta?
SBO ta para pa “Secundair Beroeps Opleiding”. Ta un skol riba nivel sekundario kaminda bo ta siña praktiká un fishi. Tur persona ku no por drenta e enseñansa regular por apliká pa drenta un trayekto na FORMA.
Kiko mi mester pa drenta SBO?
Pa drenta SBO no tin mester di ningun nivel spesífiko, tur hende por drenta SBO sin problema. Na final di e kurso e partisipante por skohe si e kier bai pa e diploma pa kual e tin ku traha un eksamen. Tambe lo brinda kursistanan e oportunidat pa kaba na kurso sin traha eksamen, e kursistanan aki lo risibí un sertifikado.
Bai skol i traha pareu?
SBO ta un kurso kaminda bo ta traha i siña pareu. Bo ta bai skol pa 3 dia i traha pa e sobrá dianan pa kual bo ta wòrdu pagá. E promé tres lunanan, bo ta bai skol so pa asina haña e práktika pa kuminsá traha de Horeca.
Tur persona ku apliká pa sigui un trayekto di edukashon na FORMA mester traha un tarea di kapasitashon (instaptoets). Den e tarea aki ta midi e nivel di funshonamentu di kada partisipante riba nivel di lesa, skirbi i matemátika. Dependiendo di e nivel di kada persona ta diseñá un trayekto di kapasitashon i guia pa e partisipante pa asina garantisá éksito.
Huntu ku e “instaptoets” ta hasi tambe un intake sosial, den kual lo determiná e faktornan ku ta determinante pa e studiante por tin éksito i lo guia e studiante pa haña e solushonnan práktiko pa por solushoná esakinan.
E kursonan di SBO lo wòrdu duná riba nivel 1. Nivel 1 ta fishi riba nivel di asistente. Pa e asistente di Horeca esaki ta nifiká ku e kursista por bai traha den un establesimentu ku ta sirbi bebida òf kumindanan no di luho (restorant simpel). Un asistente den horeca ta desplegá e siguiente trabounan bou guia:
-
Trabounan di preparashon;
-
Trabounan di drecha lokashon promé i despues di ora di habri;
-
Preparashon di kumindanan simpel (por ehèmpel salada).
E asistente di horeca semper ta traha bou di supervishon i ta responsabel pa trabounan asigná na dje. Su trabounan semper ta standarisá i simpel den ehekushon.
E kurso di SBO asistente di Horeca ta konsistí di 3 modulo:
- Formashon general (papiamentu, ingles, hulandes, formashon sosial, komunikashon)
- Teoria di fishi
- Praktika (Sirbi i kushina)
Despues di kaba e kurso di asistente di Horeca nivel 1, kursistanan por sigui ku nivel 2 kaminda por skohe pa spesialisá den e área di bartènder, gastheer/vrouw òf kòki.
Kordinadó di departamentu:
Soraida Mensché-Statius
Trahado di Formashon Edukashonal:
Germaine Girigori
Asistente di klas:
Rosemarin Craane
