Dikon FORMA ta organisá kurso
FORMA a ripara ku tin hopi persona adulto ku hopi biaha ta trahando kaba pero ke tòch bai un of otro kurso pa halsa nan nivel. Pa e hendenan aki FORMA ta organisá kursonan parti anochi.
Kursonan ku FORMA ta ofresé
Kursonan ku sigur ta bin bek tur aña ta esnan di idioma manera:
- Hulandes tantu básiko komo avansá pa personanan ku lenga matèrno spañó o papiamentu
- Hulandes tantu básiko komo avansá pa personanan ku lenga matèrno ingles
- Ingles tantu básiko komo avansá pa personanan ku lenga matèrno spañó o papiamentu
- Ingles tantu básiko komo avansá pa personanan ku lenga matèrno hulandes
- Papiamentu tantu básiko komo avansá pa personanan ku lenga materno hulandes o ingles
- Papiamentu tantu básiko komo avansá pa personanan ku lenga materno Spañó
- Papiamentu ortografia
E kursonan aki normalmente ta wòrdu organisá dos biaha pa aña, un biaha den e promé mitar di aña i un biaha mas den e di dos mitar di aña.
Fuera di e kursonan aki, FORMA ta organisá diferente otro kurso mas. Dor di sondia e merkado i petishonnan ku ta drenta, FORMA ta haña sa pa kua kurso tin nesesidat e momentu ei.
Pa aña 2009 FORMA tin e siguiente kursonan pa ofresé:
- Elèktrishèn nivel 1 (ta kuminsa prome siman di februari)
- Elèktrishèn nivel 2 (ta kuminsa di dos siman di augustus)
- Kurso Bon Servisio (ta kuminsa prome siman di februari i prome siman di september)
- BKB (Basiskennis Boekhouden) (ta kuminsa prome siman di februari)
- BKC (Basiskennis Calculatie) (ta kuminsa di dos siman di augustus)
- Kurso Naturalisashon speshal pa estranheronan ku ke hanja pasport Hulandes (ta kuminsa prome siman di januari i prome siman di september)
- Mekániko di refrigerashon (Koelmonteur) (fecha pa kuminsa no ta konosi ainda)
- Kon pa dorna bo sala di fiesta (fecha pa kuminsa no ta konosi ainda)
- Idiomanan (ta kuminsa prome siman di februari i prome siman di september)
Sigui subi e website di FORMA pa bo haña sa ki dia e kursonan ku no tin fecha awor aki ainda ta kuminsá.
Momentunan impreshonante
Entrega di sertifikado semper ta masha bunita pa wak kon orguyoso e kursista ta ku su logro. Tabata masha impreshonante kon un kursista hulandes a duna un testimonio ora ku ela konta ku ela resa pidi pa e por a sinja papia papiamentu bon, mas lihe pusibel. E senjora tabata esun ku a hanja e miho puntonan pa su bruebanan.
Preis i durashon di kurso
Kurso di idioma ta kosta fl. 380,00. Preis pa inskripshon lo ta fl. 50,00. E suma aki ta wòrdu paga na momentu ku bo inskribí bo mes. Ora ku bo paga pa e kurso FORMA ta deskontá e suma aki.
Durante 12 siman bo ta bai lès 2 biaha pa siman, kada lès tin un durashon di un ora i mei.
Pa e otro kursonan por bel i puntra preis na FORMA durante oranan di ofisina.
Ora ku FORMA ta bai kuminsá ku un kurso ta pone un aviso den korant, anunsionan na radio i tambe posternan den diferente negoshinan. For di e momentu ei por pasa inskribí na ofisina di FORMA o por hasi esaki via e formulario di inskripshon riba e website aki.
Pe e kursonan di idioma FORMA ta laga e kursista traha un tèst inisial kòrtiku pa asina por determiná si nan mester ta den kurso básiko o avansá.
Na momentu di inskripshon tin ku paga fl. 50,00. E suma aki ta wòrdu deskontá na momentu ku ta paga pa e kurso. Por paga e kurso den dos biaha, mitar promé ku e kuminsá i e otro mitar fin di e luna siguiente. Por paga serka e kahera na FORMA mes o depositá riba kuenta di FORMA na M.C.B. (Bonaire) # 101.127.96
E kordinadó di e departamentu di kurso komersial ta Margie Thodé. El a traha semper den atministrashon finansiero pa kompanianan grandi i pa 10 aña tabatin su propio negoshi.
