MBO

MBO nivel 1

Estudio di  Asistente ENTREE

E estudio di ENTREE ta un estudio amplio i práktiko. Bo ta skohe un ‘profil’ ku ta pas bo. Bo por skohe for di 5 profil. Komo Asistente ENTREE semper bo ta traha huntu ku un kolega òf bou di guia di bo doño di trabou. Bo ta traha ku bo man i tin kontakto ku kliente.

Eksigensianan di trabou

· Bo ta gusta traha ku man

· Bo ta gusta hasi

· Bo ta kumpli ku palabrashon

· Bo por sigui instrukshon

· Bo por skucha

· Bo ta gusta traha huntu

Pa ken?

· Si bo no tin diploma

· Si bo tin mínimo 16 aña di edat

BOL òf BBL?

Nos ta ofresé sierto profil den BOL (beroepsopleidende leerweg) i sierto den BBL (beroepsbegeleidende leerweg.)

Den un BOL bo ta bai skol 5 dia pa siman i for di e di dos periodo bo ta bai stazje. E stazje ta akumulá. Bo ta kuminsá 1 biaha pa siman, den e siguiente periodo e ta bira 2 biaha pa siman i na final e ta 3 biaha pa siman.

Den un BBL bo tin un kontrato ku un doño di trabou. Bo ta bai skol 1 1/2 dia den siman pa siña e parti di teoria. E otro dianan bo ta na trabou i bo ta siña e parti práktiko.

Kontenido estudio di Asistente ENTREE

E estudio ta konsistí di 3 parti, un parti básiko, un parti di profil i parti di eskoho. Den tur parti bo ta dirigí bo mes pa siña siensia, komprenshon, abilidatnan i komportashon. Esaki ta nesesario pa un bon ehersisio di futuro profeshon. Bo mester finalisá tur tres parti di e estudio pa haña un diploma.

E estudio ta dura 1 aña. Bo tin lès di teoria i lès práktiko. Bo ta traha tambe komo Asistente den e edifisio di Forma. Bo ta traha den kantina i na resepshon. Durante e estudio bo ta mantené tur bo tareanan di lès den un portafolio. Bo ta mantené esaki pa proba na final kiko bo a siña i kua trabou bo a hasi pa hal bo diploma. 

Den tur profil bo ta haña tambe e materianan papiamentu, hulandes, ingles, matemátika, i Karera & Siudadania (loopbaan en burgerschap).

Bo ta skohe un di e 5 profilnan:

1. Asistente Kuido i Servisio (BOL)

Assistent in Care and  Service

Si bo skohe e profil akí bo lo traha den área di kuido i bienestar, deporte, rekreashon òf fasilidat. Bo ta siña anda ku kliente i kon nan medio sosial ta. Banda di esei bo ta siña tokante alimento i higiena.


2. Asistente di Horeca i Alimento (BOL/BBL)

Assistant in food, beverage and hospitality

Si bo skohe e profil akí bo lo traha ku pan i bankèt, den restorant òf hotèl òf den prosesamentu di alimento.  Bo ta siña kushiná, téknika pa kòrta, sirbi i deskubrí diferente produktonan i nan preparashon.


3. Asistente di Benta i Komersio por mayor (BOL)

Assistant in sales, retail and wholesale

Si bo skohe e profil akí bo ta siña trabou di un bendedó aspirante. Bo por traha den kasi tur área di trabou. Bo ta siña kon kos ta bai den un tienda, anda ku kliente i kolega i kiko bo por hasi ku produktonan den un tienda.


4. Assistente di konstrukshon i mantenshon (BBL)

Assistant in construction and maintenance

Si bo skohe e profil akí bo lo traha den konstrukshon, infrastruktura, traha muebel, traha ku palu òf fèrf.

Durante e estudio bo lo siña zag, bora, pinta,  pero tambe kua hèrmènt bo por usa pa kiko.


5. Asistente di agrikultura i preservashon di naturalesa

Assistant in agriculture and nature preservation

Si bo skohe e profil akí bo lo traha den agrikultura òf plantashon i mantenshon di hardin. Durante e estudio bo ta siña botánika, planta, transportashon i kua hèrmènt bo ta usa pa kiko.


Eksamen i diploma

Durante e estudio bo lo haña prueba i èksamen.

Tur periodo bo ta haña prueba pa midi i sigui bo desaroyo. Bo ta warda tur tarea i tur prueba den bo portafolio. E rapòrt ta duna bo un bista kla kua siensia i abilidat bo ta dominá i kua ta pidi mas atenshon. Mínimo 1 biaha pa periodo bo tin un kombersashon (POP) ku bo EVW’er. Na e momentu ei bo ta palabrá bo desaroyo: kiko bo por i kiko bo ke siña. Bo EVW’er ta guia bo durante hinter e estudio, e por duna bo konseho i ta organisá yudansa èkstra si ta nesesario.

Si bo a traha tur tarea i prueba bo mag hasi èksamen. E èksamen ta determiná si bo ta dominá tur e abilidatnan i ta kumpli ku hinter e núkleo di bo estudio. Tambe materianan di hulandes, ingles, papiamentu, matemátika i Karera & Siudadania tin su propio èksamen. Tur èksamen ta tuma lugá den e delaster periodo. Di kua manera e èksamennan ei ta konta, bo por mira den Guia di ENTREE. Banda di èksamen bo mester terminá bo stazje ku un promedio sufisiente.


Guia personal

Tur studiante di FORMA tin nan mes EVW’er (Educatief Vormingswerker.) E EVW’er ta palabrá bo desaroyo i por organisá yudansa èkstra si ta nesesario. Pa tur studiantenan nos tin trahadó sosial i un koordinadó di kuido. Den intake òf na momentu ku ta nesesario bo por hasi palabrashon tokante kua guia bo mester.


Futuro

Despues di finalisá un estudio di ENTREE bo por skohe pa traha òf sigui studia na MBO nivel 2. Pa sigui studia bo mester hal un nivel sufisiente den e materia hulandes.


Informashon i aplikashon

Bo ke sa mas tokante di nos trayektonan? Bishitá nos na Kaya L.D. Gerharts 15, yama nos na 717 69 49 òf manda un mail: info@fundashonforma.com.

Si bo ke apliká, yena nos formulario di aplikashon na Forma mes òf na www.fundashonforma.com.

Apliká na tempu, pasobra lugá ta limitá.


Intake

Promé ku bo kuminsá ku un estudio bo ta haña un intake i un instaptoets. Na intake e koordinadó i e trahadó sosial ta chèk si e estudio ku bo a skohe ta kuadra ku bo. Bo ta prepará pa e kombersashon akí i ta bin ku un kopia di bo ID, bo delaster rapòrt/lista di sifra i dokumentonan importante manera bo kontrato di trabou (den kaso di BBL), un deklarashon médiko òf por ehèmpel un deklarashon di disleksia.  

Despues di e kombersashon bo ta hasi e instaptoets, den instaptoets nos ta midi bo dominio básiko di idioma, i abilidat matemátiko.

Basá riba e intake i resultado di bo instaptoets bo ta hasi eskoho di estudio definitivo huntu ku e koordinadó. Esaki ta sosodé durante un kombersashon di posishonamentu.

PAGA TINU: nos prosedura di intake ta tuma máksimo 2 siman. Pues yena bo formulario di aplikashon na tempu.


Fecha di inisio

2 momentu di inisio:

1. 22 di ougùstùs 2016 (apliká promé ku 1 di yüli relashoná ku fakansi grandi)

2. 23 di yanüari 2017.

Kompensashon:

-Studiantenan ku ta entre 18 te ku 24 aña di edat i no tin kualifikashon ta bini na remarke pa SKJ.

-Studiantenan entre 18 te ku 30 aña di edat ta bini na remarke pa finansiamentu di estudio.

Pa mas informashon puntra bo koordinadó durante di intake.


Eksigensia pa atmishon na ENTREE

Bo ta inskribí na Boneiru i tin ID di Boneiru, Statia òf Saba.

Bo NO tin diploma (di VMBO, HAVO/VWO òf MBO)

Bo tin mas di 16 aña di edat despues di 31 di ougùstùs.  

Pa mas informashon i pa aplikashon, pasa na FORMA! Nos porta ta habrí pa bo.