30 studiante di FORMA ta risibí diploma di MBO nivel 1

Riba djarason anochi durante un seremonia di graduashon konhuntamente ku MBO di SGB, trinta studiante di Fundashon FORMA a risibí nan diploma di MBO nivel 1.

Di e total di 39 studiante ku a hasi nan eksamen, 30 a logra finalisá esaki ku éksito. Esaki ta bon pa un porsentahe di 78%. FORMA ta sumamente satisfecho ku e logro aki di e studiantenan. E fórmula ku e fundashon ta usa ta dor di duna hopi guia sosial emoshonal na kada partisipante. Ademas di esei e estudionan na FORMA ta kompletamente na papiamentu pues dominio di idiomanan stranhero no mester ta un opstákulo pa e studiantenan. I por bisa ku un biaha mas nan a logra di duna studiantenan un di dos chèns den bida.

Sra. Soraida Mensche, kordinadó di estudionan di MBO na FORMA a dirigí su mes na presentenan: “FORMA ta un instansia ku ta duna un di dos oportunidat na personanan ku a frakasá den nan promé intento. Nos ta papia e ora ei di e hóben ku a sali na estado bayendo skol, ku mester a kita for di skol pa bai traha pa kria su yu. Nos ta papia di e kabayero tòf ku pa motibu di mal amistat a hañ’é konfrontá ku problema ku hustisia i a kai será pa un par di tempu. Nos ta papia di e hóben ku problema familiar ku tabata strob’é pa por a konsentrá sufisiente riba su estudio i p’esei a kai afó. Òf simplemente difikultat pa sigui e sistema di enseñansa tradishonal a pone ku nan a keda atras.

Pero kiko ta pasa ora e di dos chèns aki tambe a pasabo bai, e di tres i e di kuater tambe? E ora ei nos ta papia di e último chèns. E último chèns den bida di un persona. Esaki ta e grupo ku kual FORMA ta traha tambe. Nan ta adultonan sin nunka nan por tabata hóben. Nan a hiba karga di finansa, problema sosial i emoshonal di nan famianan. Nan nunka por a tuma chènsnan ku a pasa nan dilanti.

Pero despues ku e bela di nan oportunidatnan a kasi paga nan a tuma e kurashi pa purba e último biaha. Kiko ta e diferensia entre tur e otro biahanan? E problemanan sosial -emoshonal, finansiero i familiar a keda mesun kos. E salú dor di añanan no a drecha, tin biaha el a asta bira pió. Kiko ta e diferensia entre awe i ayera? Awe nos a otorgá diploma na adultonan. Adultonan ku a tribi di sali for di loke pa nan ta sigur i tribi di landa den e laman brutu ku yama enseñansa. Adultonan ku a tribi di habri nan hala i bula pa asina diskubrí ku mundu a habri pa nan. “

E miho graduado di e estudionan ta Analia Martis pa horeca, pa AKA Mackson Charles i Maria Calcaño Osorio i konstrukshon Luis Antonio Abreu.