A entregá di diploma na studiantenan di SBO Horeca nivel 1

Spich di sra. Inge Berben na okashon di entrega di diploma pa studiantenan di SBO Horeca nivel 1 ku a tuma lugá dia 24 di yüni 2008 na edifisio di ABVO na Yato Bako huntu ku studiantenan di SBO di SGB.

Awe ta un dia históriko pa Fundashon FORMA. Den koperashon ku SGB nos awe ta hasi entrega di diploma di nos promé estudio rekonosé di SBO nivel 1. Mi ta orguyoso!!

Awendia nos tin Lastimamente hopi hende adulto den nos komunidat ku, dor di diferente sirkunstanshanan, no por kaba ku un estudio òf nunka tabatin oportunidat pa sigui studia despues skol básiko.

Fundashon FORMA kier hasi un diferensha pa e hende aki. Den e delaster dos aña nos a traha duru pa logra un struktura ku ta duna tur adulto den nos komunidat e oportunidat pa eduká i “upgrade” nan mes riba diferente nivel.

Esei no por a logra sin un akuerdo di koperashon ku SGB i sin e dedikashon di diferente profeshonalnan. E logro dia we nochi ta un logro di:

  • Promé instante e perseveransia di tur e kursistanan di FORMA.
  • E abilidat organisatorio i e trankilidat di e kordinadó di SBO FORMA sra. Soraida Mensché
  • Dedikashon, konosementu i entusiasmo di Kees Leeman, Kordinadó di SBO Horeca SGB
  • Hospitalidat di SGB i su direktor sr. Pop, pa usa e fasilidatnan
  • Animo i profeshonalidat di e dosentenan, Helen Hoen, Juni Vos, Liz Rijna, Vernon Martijn, Kees Leeman, Ezzard Semeleer i Ircelyn Kocks
  • Amor i guiansa di e tim di Sociaal Vormingsplicht di FORMA, Zaida Ellis, Suzanne Beaumont, Jona Chirino, Niovis Schrader i Renata Domacasse.

Mi ke yama boso tur danki pa boso esfuerso i e logro grandi aki.

“Last but not least” mi kier para ketu un ratu na e kursistanan: Josue, Miriana, Jacqueline, Rusaimy, Shariselle, Ishariska, Shamayra, Shanayra, Dayanarah, Arys, Gwendoline i Harry.

Pa sigui ku un estudio no tabata semper fásil. Tabatin situashon den bida ku a pone boso na prueba. Boso perseveransia i motivashon a sòru ku boso a slag! Mi ta orguyoso ku boso logro. Pa yega na e resultado aki ta algu grandi! No solamente boso a kambia e perspektiva di boso mes, boso tambe a traha duru pa engrandesé e oportunidat di futuro pa boso yunan. Masha pabien ku boso diploma. Esun ku no a yega asina leu ainda..... “zet door”, sigui lucha paso boso tambe por!

Pabien i salú