Alfa Award pa Büró Reibeweis Boneiru

For di aña 2012 FORMA a introdusí e premio yamá “Alfa Award”. Ku e nominashon prestigioso aki FORMA ta pone un persona, organisashon òf kompania ku a hasi su esfuerso pa kombatí analfabetismo i/òf ku ta hasi esfuerso pa stimulá e partisipashon i emansipashon di e analfabeta funshonal na Boneiru den spotlight. E aña akí FORMA a premia ta Büró Reibeweis Boneiru ku un “Alfa Award”.

Lès di teoria reibeweis pa analfabeta funshonal

FORMA ta duna kurso di teoria reibeweis. FORMA ta organisá e kurso akí i tin un dosente spesial ku ta duna e lèsnan. E kurso ta spesial pa personanan ku no por lesa ni skibi sufisiente, pa por studia e materia pa por hasi e èksamen. Den e lès ta splika e reglanan i bòrchinan di forma oral. Esaki ta nifiká ku e dosente ta duna splikashon papiá.

Tambe tin un CD ku e kursista ta skucha. Pa asina nan siña e preguntanan. E idioma ku ta usa den lès ta Papiamentu. E kurso ta dura 10 siman i tin lès 2 biaha pa siman. Total e kursista ta haña 20 lès, kaba e kursista ta bai pasa èksamen. Büró reibeweis ta responsabel pa e èksamen. E èksamen tin mesun eksigensianan ku e èksamen regular. Solamente e èksamen ta oral.

Na yüli i ougùstùs 2014 atrobe 5 kursista a logra nan teoria pa reibeweis. Porsentahe di éksito di e grupo akí tabata 100%. Tin algun kursista tin e deseo pa sigui ku èksamen di trùk i bùs. Pa asina nan tin mas posibilidat pa trabou. Esaki por pasobra e èksamen di teoria ta keda válido pa un aña i e teoria ta konta tambe pa trùk i bùs.

Nesesidat kurso teoria reibeweis

E nesesidat pa un kurso i èksamen di reibeweis manera esaki ta hopi grandi na Boneiru. Na Boneiru tin 25% di adulto ku no por lesa i skibi sufisiente pa por partisipá independiente den nos komunidat. Por ehèmpel: un hende por lesa palabra òf un frase ku palabranan kòrtiku, pero e no por lesa i komprondé frase largu i kompliká. Den un kaso asina ta sumamente difísil, kasi imposibel, pa e persona por lesa i siña e teoria di reibeweis. E nivel di lesa i komprondé ku ta eksiguí pa un hende por siña e teoria for di buki i hasi e èksamen ta bastante haltu. E persona mester por lesa i komprondé palabranan no diario, palabranan akadémiko i tèrminologia di tráfiko, manera: prohibishon, atvertensia, preferensia.

Traha huntu

FORMA ta traha den kolaborashon ku Büró Reibeweis. FORMA ta apresiá inmensamente kon e personal di büró reibeweis ta atendé den e proseso pa bai èksamen i e èksamen mes tambe. Kuminsando na e planifikashon di e fecha di èksamen te na e èksamen. E personal ta risibí e kursista ku un sonrisa, amabel i servisial, ta motiv’é ku palabranan positivo, promé ku e drenta pa su èksamen, hasi un ‘joke’ lokual ta kibra e eis i trankilisá e persona un tiki. Tur esaki ta kontribuí pa e persona por pasa e èksamen trankil i logra su reibeweis.

Pa medio di logra e reibeweis, e adulto analfabeta funshonal por move independiente di A bai B, nan por yega nan trabou mas fásil, nan por yuda nan yunan i nan ñetunan pa ku transporte, nan tin mas chèns pa logra haña un trabou i logra krese den nan trabou.

Por pasa na FORMA pa mas informashon di kurso di alfabetisashon òf pa inskribí. Number di kontakto ta 717-6949.