Bunita logro di studiantenan di FORMA

Kralendijk – FORMA ta hopi orguyoso di por kompartí diferente logro di su studiantenan den e último lunanan aki. Un studiante a logra haña su diploma di Divemaster. Sinku studiante a logra pasa nan eksámen di teoria di reibeweis ku éksito. FORMA ta sumamente orguyoso di e studiantenan akí komo ku pa hopi di nan esaki ta nan promé eksperensia di éksito ku nan a yega di haña den nan bida.

Divemaster

Rugene Marinus a drenta e trayekto di FORMA Básiko na 2014. Den yanüari 2015 Rugene a kuminsá su trayekto di ATL (Arbeidstoeleiding), esta Guia pa Trabou. Den e trayekto akí studiantenan ta haña guia pa buska un trabou fiho i ta bin skol bèk un biaha pa siman pa traha riba e kompetensianan laboral na skol. Rugene a haña un kontrato for di sèptèmber 2015 na Wannadive i a kuminsá ku su training pa bira Divemaster. Den luna di mei 2016 Rugene a logra pasa su eksámen ku éksito i via di Wannadive ta trahando na Toucan Diving.

Reibeweis

Un parti integral di e trayekto di ATL ta pa studiantenan haña un reibeweis. E reibeweis ta habri nan oportunidat pa krese den trabou i tambe ta un “boost” pa nan sintimentu di independensia i seguridat den na mes. Un grupo di 5 studiante a pasa nan èksamen di teoria di reibeweis ku éksito. Den luna di yüni nan ta bai pasa nan eksámen di práktika i asina nan tin nan Reibeweis B.

 FORMA ta felisitá tur e studiantenan ku nan logro.