Diversidat di kurso na Fundashon FORMA

Despues di fakansi grandi Fundashon FORMA a kuminsá ku diferente kurso. E kursonan ta dirigí riba demanda di hende partikular i tambe for di komersio i industria.

Na final di luna di ougùstùs FORMA a kuminsá ku kurso di ‘Basiskennis Boekhouding’, kurso di Kòmpiuter Básiko ku Windows i Internet Explorer i kurso di Elèktrishèn módulo 3. Na e momentunan aki e kurso di ‘Basiskennis Boekhouding’ ta e kurso ku un durashon mas largu na FORMA. E programa ta dura 5 luna i ta finalisá esaki 23 di yanüari 2013 ku un èksamen ofisial via di internèt di e Asosashon pa Èksamen Práktiko.

Kòmpiuter Básiko ta un kurso nobo na FORMA, kaminda personanan ku no tin konosementu òf konosementu sufisiente di kòmpiuter por bira digitalmente ábil.

Entretantu tur kursista a finalisá e kurso aki ku éksito. E kurso di Elèktrishèn Básiko módulo 3 ta kontinuashon di e módulo 1 i 2 ku FORMA a ofresé den pasado. Medio desèmber 2012 e grupo aki ta finalisá e kurso.

Medio sèptèmber 2012 kursonan di hulandes komo di dos idioma (NT2) i papiamentu básiko a kuminsá. E kursistanan di NT2 ta será konosí ku e idioma hulandes pa medio di diferente método ku ta keda apliká. Di e kurso aki lo tin kontinuashon pasobra siñamentu di idioma hulandes ta un proseso ku ta tuma tempu. Na Hulanda e promé parti di e kurso di NT2 ta dura aproksimadamente 8 luna.

Papiamentu Básiko ta pa kursistanan ku no ta komprondé ni papia papiamentu òf no ta hasi esaki sufisiente.

Òktober 2012 dos kurso mas a kuminsá, esta Servisio Ekselente i kurso di introdukshon di las. Servisio Ekselente no ta dirigí su mes riba e konsepto ‘Customer Service’ so. Pero tambe riba aktitut i komportashon. Pensa tambe riba etikèt, anda ku konflikto, duna i risibí fitbèk, komunikashon verbal i no- verbal . E kurso di Introdukshon di las ta un programa inisial dirigí na kursistanan ku no tin òf tin un tiki eksperensia ku e materia i tin sentido p’e.

Segun e kordinadó di kurso, Sra. Pamela Paz, FORMA ta kuminsá na yanüari i febrüari ofresé kursonan ku aktualmente tambe ta duná. Banda di e aktual kursonan ku FORMA ta ofresé lo kuminsá ku kursonan nobo tambe manera: Kurso di karpinteria fini, ‘General Safety Awareness Training’, ingles básiko, i e kurso di kontinuashon di hulandes komo di dos idioma (NT2). FORMA ta inovando riba e tereno di kurso i pa 2013 tin un kantidat amplio di kurso planiá.