E variedat di kurso na FORMA ta sigui ekspandé

Fundashon FORMA a ofresé un variedat grandi di kurso. Esaki ta trese kuné ku mas kursista ta interesá pa inskribí nan mes pa un kurso. E demanda di kursonan na FORMA ta grandi.

Fin di yanüari 2013 FORMA a kuminsá ku kursonan di Ingles Básiko, Papiamentu Básiko, Papiamentu Kombersashon i Hulandes NT2 parti 1. Pa e kurso di Ingles Básiko, FORMA a kuminsá un di dos grupo, mirando ku e demanda pa e kurso tabata grandi. E kurso di Papiamentu Kombersashon, FORMA ta ofresé, komo un kurso pa personal di un empresa. Na febrüari 2013 a kuminsá kursonan di Kòmpiuter Básiko, WORD Básiko i Hulandes NT parti 2. Na e momentu akí FORMA tin 8 grupo siguiendo e diferente kursonan.

Kursistanan di FORMA ta bini for di entre otro Boneiru, Kòrsou, Aruba, Perú, Colombia, Venezuela, Repúblika Dominikana, Haiti i Hulanda. Esaki ta nifiká ku e dosentenan banda di tin un kualifikashon pa duna lès i abilidatnan di un dosente, ta poseé tambe di abilidat multilingual. Na e manera akí ta forma gruponan i hasi e diversidat den e gruponan amplio. Ta duna mayoria kurso na papiamentu i spañó. Tambe ta kreando mas posibilidat pa ingles i hulandes.

Na aprel 2013 FORMA ta bai kuminsá ku e siguiente kursonan: Presupuesto Familiar (9 di aprel), Abilidat Sosial, Abilidat Komunikativo, Occupational Safety and Health Administration (OSHA) i General Safety Awareness Training (GSAT). Fundashon FORMA ta será for di djaweps 28 di mart te ku djabièrnè 5 di aprel 2013. Despues di e periodo di fakansi akí, tin posibilidat pa haña mas informashon i/òf inskribí pa un òf otro kurso.