FORMA a partisipá en grande na aktividat di BONDOET 2015

Riba djabièrnè i djasabra siman pasá Fundashon FORMA a partisipá pa di kuater aña konsekutivo na e aktividat di boluntario BONDOET. E aña akí FORMA su enfoke prinsipal tabata nos grandinan. Studiantenan i trahadónan di FORMA a entretené nos grandinan i tambe a hasi trabou di mantenshon na kas di grandinan i na restorant di SBG Chez Nous.

Riba djabièrnè FORMA a sali ku tres grupo di studiante i trahadónan pa hasi trabou boluntario den kuadro di e proyekto BONDOET. Esaki ta e dia kuater aña ku FORMA ta inkorporá esaki den programa di estudio di su diferente estudio i trayektonan. Huntu ku e studiantenan tur trahadó di FORMA riba e dia akí ta hasi trabou boluntario. FORMA ta aportá di e manera akí na komunidat i tambe ta siña e studiantenan pa duna un man na nos komunidat.

Un grupo di studiante i dosentenan a kompañá grandinan di Cocari pa hasi un paseo pa Klein Bonaire i despues a reuní e grupo den kura di bestuurskantoor kaminda nan a hunga bon kuné i yuda parti kuminda te den oranan di atardi.

E di dos grupo ku a konsistí di trahadónan di FORMA a bai Antriol na kas di grandinan Kalor di Hogar. Miéntras un grupo a ferf e edifisio paden i pafó algun trahadó di FORMA a entretené e grandinan hungando wega di Bingo.

E di tres grupo a sali pa Kas di Kuido na Hospital kaminda nan a entretené un grupo grandi di hende grandi dunando presentashon di nan talentonan i hungando weganan di ántes.

Riba djasabra un grupo di studiantenan di Horeca huntu ku algun dosente a bai e restorant di SGB Chez Nous kaminda nan a hasi trabounan di limpiesa i ferf.

Pa klousurá e temporada di BONDOET akí riba djaluna FORMA a hasi entrega di algun fli na e Stichting Langverblijfhuis den Playa. Esakinan ta obra di studiantenan di FORMA den prizon (JICN) ku ta sigui un trayekto di formashon sosial. Nan tambe kier a duna nan aporte na komunidat i a skohe pa hasi esaki dor di traha fli pa e hóbennan di e Stichting Langverblijfhuis. Tambe nan a usa e oportunidat pa manda un karta pa e hóbennan ku bunita palabra di konseho.

FORMA ta mira bek riba un periodo di BONDOET eksitoso i ta kla pa sigui duna nan aporte na e aktividat akí otro aña atrobe