FORMA a start ku preparashon pa stazje na Italia pa studiantenan di horeca

Fundashon FORMA a kuminsá prepará pa biahe di tres studiante de horeca pa Italia den luna di yüni 2013. E biahe ta pa e hóbennan kore un stazje di tres siman na un skol kulinario na Italia. E oportunidat aki ta parti di e proyekto anual di Bonaire Culinary Foundation bou di guia di Sra. Sara Matera.

Pa nuebe aña kaba tin e proyekto di interkambio di studiantenan di Italia i Boneiru. Studiantenan di horeca di Italia ta bin Boneiru i esnan di Boneiru ta bai Italia pa un stazje di tres siman. E aña aki 8 studiante lo biaha pa Italia kaminda nan lo kore stazje na Nazareno “Scuola Regionale Specializzata della Ristorazione”. E skol kulinario ta keda na Carpi den region Emilia Romana. Durante e tres siman e studiantenan lo risibí instrukshon di dosentenan profeshonal den e arte kulinario di kushina Italiano.

E studiantenan lo biaha dia 23 di yüni próksimo i bini Boneiru bèk dia 14 di yüli 2013. Promé ku biaha pa Italia, e studiantenan lo bai organisá diferente aktividat di fundraising pa yuda kubri e gastunan di nan biahe. Nos lo tene tur hende na altura di e aktividatnan. Den e simannan aki tambe FORMA ta aserkando diferente kompania pa koperashon den forma di sponsoring.

E grupo ta konsistí di 3 studiante di FORMA, Asistente di Horeca, MBO nivel 1: Deiby Romero Aponte, Yzaijn Bienvenu i Ronald Gosepa i 5 studiante di SGB, VMBO: Giandrick Manuel, Jenueviène Casper, Hillary Cardoze, Jean Carlos Pourier i Rimmon de Vries. Komo guia lo biaha Ezzard Semeleer di SGB, Pierre Perigault Monte i Isidoor van Riemsdijk di FORMA.