FORMA a start ku SBO Horeca nivel 1

Riba 1 di òktober 2007 FORMA a duna inisio ofisial di aña eskolar 2007-2008 pa un estudio nobo di fishi den area di Horeca. E estudio aki ta riba nivel sekundario i ta prepará e studiantenan pa un trabou di asistente den e area di Horeca. Na final di e estudio studiante por opta pa bai traha den e area di Horeca of sigui studia riba nivel 2 ku ta wòrdu duná na SGB.

Pa FORMA ta un primisia ya ku esaki ta bai bira un estudio kaminda studiante por finalisá esaki ku un diploma rekonosé di FORMA. Un total di 18 studiante a inskribí pa e estudio ku a kuminsá dia promé di òktober i lo tin un durashon di un aña. Hopi di e studiantenan ku e kuminsá e estudio djaluna ta studiantenan ku ya a sigui un trayekto preparatorio na FORMA.

Na e dia di introdukshon aki FORMA por a konta ku entre otro presensia di diputado di enseñansa sra. Maritza Silberie kende a enfatisá riba e echo ku den futuro gobièrnu tin komo meta pa kada habitante di e isla aki por alkansá un mínimo nivel 1 di enseñansa sekundario.

FORMA di su banda lo sigui traha riba e enseñansa di fishi riba nivel 1 di enseñansa sekundario. Pa esaki FORMA kontinuamente ta sondea merkado laboral i ta trese e estudionan ku ta kuadra ku e nesesidat di merkado.