FORMA ta duna trayekto di formashon den prison i pronto na Rincon

Riba djabièrnè 25 di òktober 2013 FORMA a hasi entrega di sertifikado di formashon Básiko na un detenido den JICN (prison). Esaki ta e di dos biaha ku detenidonan ta finalisá nan trayekto di e forma aki.

Den luna di sèptèmber FORMA a entrega 3 sertifikado na detenidonan. Entretantu dos di nan a sali for di prison i a sigui ku nan trayekto di estudio di fishi. Un di e studiantenan a sigui na FORMA mes hasiendo un estudio di MBO nivel 1. E otro a sigui na MBO nivel 2 na SGB. E di tres ta finalisando un kurso di elektro den JICN mes. FORMA ta sumamente kontentu di por a logra esaki i ta kere ku niun muraya por impedí ku hóbennan por haña e formashon ku nan tin derechi riba dje. Ku e aporte aki tambe FORMA ta spera di por aportá pa kanalisá bida di e hóbennan aki pa asina nan por ta un mihó suidadano ora ku nan sali for di prison.

Esaki ta parti di e esfuersonan kontinuo di e fundashon pa duna formashon básiko na hóbennan entre 18 pa 24 aña di edat. FORMA a base di un akuerdo ku JICN ta duna e trayekto Básiko den e murayanan di prison. Un dosente ta sòru pa tur dia e detenidonan tin un programa ekstensivo di formashon ku ta prepará nan pa por sigui studia òf subi merkado laboral ora ku nan kaba kumpli ku nan tempu di kondena.

FORMA tambe ta orientando pa hiba e trayekto di formashon básiko pa e bario di Rincon. Pues den e lunanan ku ta sigui FORMA lo bai informá e bario di Rincon kiko ta e plannan pa ku esaki.