FORMA ta firma kontrato di penshun pa trahadónan ku kompania ENNIA N.V.

Riba djabièrnè 29 di febrüari 2008 direktiva di Fundashon FORMA a firma un seguro di penshun pa su trahadónan serka e kompania di seguro Ennia N.V. E momento festivo aki a tuma lugá den presensia di trahadónan di FORMA i empleadonan di Ennia. Na nòmber di e direktiva di FORMA a firma señores Gabi Felix i Luti Balentin. Pa Ennia a firma señor Roland Pietersz direktor ehekutivo di Ennia N.V.

E firmamentu di un seguro di penshun ta parti di esfuersonan kontinuo di e direktiva di FORMA konhuntamente ku e team di trahadó pa hasi di FORMA un organisashon stabil. “Ku esaki nos ta enfatisá ku FORMA tei pa keda i no tin ningun otro forma pa hasi e trabou aki ku no ta den e konstelashon aktual, sigun sr. Gabi Felix, miembro di direktiva.

E último 2 añanan FORMA ta pasando den un proseso rigoroso pa optimalisá su servisio na komunidat. Di un fundashon chikitu ku algun trahadó FORMA a habri 2008 konsistiendo di un staf di 11 trahadó partí den e 4 diferente departamentonan kual ta Alfabetisashon, Departamentu di Edukashon Sosial Obligatorio, Estudio di Profeshon nivel 1 (SBO) i Kursonan Kòrtiku.