FORMA ta promé instituto ku ta kumpli ku kalidat básiko sigun Inspekshon di Enseñansa

Riba 24 di sèptèmber 2013 Inspekshon di enseñansa a hasi un bishita na Fundashon FORMA pa hasi kontròl di kalidat di enseñansa i kumplimentu ku e lei di enseñansa. E rapòrt di inspekshon ta indiká ku FORMA ta e promé instituto di enseñansa ku e yega e kalidat básiko manera ta stipulá den lei.

Dos bes pa aña Inspekshon di Enseñansa ta kontrolá e kalidat di enseñansa na tur skol na islanan BES. E palabrashon ku skolnan ta pa den 2016 nan yega na e kalidat básiko manera ta stipulá den e lei di enseñansa pa islanan di BES. Huntu ku skolnan ta palabra puntonan di akshon pa yega na e kalidat aki.

FORMA for di 2011 a drenta e trayekto aki komo e instansia ku ta ehekutá e lei di Trayekto di Oportunidat pa hóbennan (Sociale Kanstrayekten Jongeren SKJ) i tambe e MBO nivel 1 aki na Boneiru. For di e rapòrt di inspekshon ta sali afó ku FORMA for 2012 a kuminsá drecha su kalidat di enseñansa konsiderablemente. E kalidat di enseñansa na 2013 ta aktualmente riba un nivel ku ya a alkansá e kalidat básiko ku un entidat di enseñansa mester kumpli kuné sigun e lei di enseñansa. Esaki ta un prestashon hopi grandi.

“FORMA ta integrá yudansa sosial, guia i enseñansa di un manera efektivo. E gerensia di FORMA tin un bista hopi klaro riba loke ta kalidat di enseñansa. P’esei Inspekshon tin konfiansa ku FORMA ta kapas di sigui desaroyá esaki.” Sigun e rapòrt di Inspekshon di enseñansa, fecha 19 di novèmber 2013.