Fundashon FORMA a entrega 80 sertifikado na kursistanan

Riba djaweps 20 di yüni 2013 Fundashon FORMA a entregá 80 sertifikado na kursistanan di e diferente kursonan. Durante e periodo di yanüari te ku yüni 2013, 80 kursista a risibí nan sertifikado di un òf mas kurso ku FORMA ta ofresé.

Dos biaha pa aña e departamentu di Kurso di Fundashon FORMA ta selebrá ampliamente entrega di sertifikado na e kursistanan ku pasa nan kurso ku éksito. Fin di yanüari 2013 FORMA a kuminsá ku kursonan di Ingles Básiko, Papiamentu Básiko, Papiamentu Kombersashon i Hulandes komo di dos idioma parti 1. Pa e kurso di Ingles Básiko, FORMA a kuminsá un di dos grupo, mirando ku e demanda pa e kurso tabata grandi. E kurso di Papiamentu Kombersashon FORMA ta ofresé komo un kurso pa personal di un empresa. Na febrüari 2013 a kuminsá kursonan di Kòmpiuter Básiko, Word Básiko i Hulandes komo di dos idioma parti 2.

Kursistanan di FORMA ta bini for di e.o. Boneiru, Kòrsou, Aruba, Perú, Colombia, Venezuela, Repúblika Dominikana, Haiti i Hulanda. Esaki ta nifiká ku e dosentenan banda di tin un kualifikashon pa duna lès i abilidatnan di un dosente, ta poseé tambe abilidatnan multilingual. Na e manera akí ta forma gruponan i ta hasi e diversidat den e gruponan amplio. Ta duna mayoria kurso na papiamentu i spañó. Tambe ta kreando mas posibilidat pa ingles i hulandes.

Disfrutando di nan kos di kome i bebe, e graduadonan i tambe e invitadonan tabata gosa riba músika di Gilbert Pourier. Pamela Paz, kordinadó di e departamentu di Kurso, a kuminsá e parti ofisial, yamando bonbiní i duna un introdukshon kòrtiku di e programa di e anochi. Despues señora Inge Berben, direktora di FORMA, a tene un diskurso enfokando riba kon tantu dosentenan komo e kursistanan ta aportá na e proseso di integrashon na Boneiru. Seguidamente e entrega di sertifikadonan mes a kuminsá pa tur graduado di e diferente gruponan. Señora Margie Thode Pourier tabata fotógrafo di kas i a sòru pa potrètnan masha bunita di e anochi akí.

Fin di ougùstùs, kuminsamentu di sèptèmber 2013, FORMA ta bai kuminsá ku diferente kurso: Idioma (Papiamentu, Hulandes i Ingles), Presupuesto Familiar, Abilidat Sosial i Komunikativo, Occupational Safety and Health Administration (OSHA), General Safety Awareness Training (GSAT), Basiskennis Boekhouden, Basiskennis Calculatie, Kompiuter Básiko i Word básiko, Introdukshon di lasmentu, Elektrishèn módulo 1 i un kurso Práktiko pa sekretaria i asistentenan den maneho. Fundashon FORMA ta será for di djaluna 8 di yüli te ku djabièrnè 2 di ougustus 2013. Promé i despues di e periodo di fakansi akí lo tin posibilidat pa ofresé mas informashon i/òf inskripshon.