Fundashon FORMA ta pasa ku éksito den investigashon di proseso di eksámen!

Kralendijk – Riba djaweps 17 di novèmber último inspekshon di Karibe Hulandes a
hasi un investigashon tokante e solides di e prosesonan di eksámen interno na
FORMA. FORMA a pasa e inspekshon ku éksito i awor ta kumpli kompletamente ku e
kalidat básiko di enseñansa.

FORMA for di 2013 ta kumpli ku e kalidat básiko ku e Trayekto Sosial di Oportunidat (SKJ) i
e MBO nivel 1. E responsabilidat formal di eksaminashon i sertifikashon di e MBO nivel 1 di
FORMA ta kai bou di responsabilidat di e komishon di eksámen di SGB. Pa e motibu aki
anteriormente nunka a hasi un investigashon apart di e prosesonan di eksaminashon di
FORMA.

E inspekshon a investigá e forma di traha i e prosedimentu di e komishon di eksámen i e
evaluadónan di práktika riba e 3 stándartnan di eksámen. E tim di komishon di eksámen di
Forma a entregá dokumentonan adelantá. Durante e kombersashon di investigashon ku
inspekshon, e evaluadónan di práktika i e tim di komishon di eksámen a wòrdu
detayadamente kuestioná tokante di nan estilo di traha i e garantia pa ku e diferente
prosesonan di eksámen, manera e stándartnan di inspekshon ta preskribí.

E inspekshon di Karibe Hulandes a saka e konklushon ku FORMA tambe ta kumpli
independientemente i totalmente ku e kondishonnan mará na e kalidat básiko pa loke ta
trata eksaminashon. “Mi ta masha orguyoso ku e enseñansa di FORMA ta kumpli ku e
kondishonnan mará na kalidat básiko for di momentu di intake te na e eksaminashon. Esaki
ta loke nos studiantenan meresé. E tim di FORMA ta meresé rekonosementu pa e bunita
trabou ku nan ta ehekutá”, palabra di sra, Inge Berben e direktor di Fundashon FORMA.

Fin di komunikado