Fundashon FORMA tambe a partisipá na BONDOET

Riba djabièrnè 15 di mart 2013 fundashon FORMA a partisipá na e akshon di limpiesa ‘Beach Clean Up’ na Williamstoren, bou di guia di e organisashon STINAPA. Esaki den kuadro di e aktividat di boluntario BONDOET organisá pa Plataforma NGO.

Un biaha mas FORMA a skohe pa embolbí nos studiantenan, kursista i personal kompletu pa mustra nan riba e importansia di hasi trabounan boluntario. Asina nan tambe ta bira mas konsiente pa hasi esaki i yuda nan komunidat.

E aña aki FORMA a bai ku un total di 96 partisipante; e personal kompletu huntu ku e studiante i kursistanan. Manera semper FORMA ta adaptá e tipo di aktividatnan aki i mara esaki na un meta di estudio, kual ta un punto di importansia durante desaroyo di kada un dje hóbennan aki. Durante e siman kada klas a haña preparashon serka nan dosente, kaminda ta mustra nan riba kompetensianan ku nan ta bai desaroyá i pa despues nan traha un relato di evaluashon pa e akshon aki.

Tambe a mara un kompetensia leuk entre kada grupo, pa saka e ganador ku entregá mas saku di shushi na final. E grupo ganador a entregá un total di 21 saku grandi, bon yená. Na di dos lugá tabatin un kantidat di 20 saku i di tres lugá un totalidat di 17 saku di shushi. E tres gruponan a risibí un premio chikitu komo estímulo i apresio pa nan esfuerso.

Tabata un dia hopi eksitoso. FORMA ta hopi satisfecho i orguyoso ku e logro aki. Asina FORMA tambe a kontribuí i yuda tene nos dushi isla limpi i bunita. Fundashon FORMA ta a gradesí Plataforma NGO pa e oportunidat, di por a partisipá e aña aki tambe na e aktividat di BONDOET.