Proyekto di kapasitashon pa personanan sin trabou

Dia 19 di mart 2007 Fundashon FORMA den estrecho koperashon ku DEZA, SASO i Fundashon Krusada a start un proyekto pa kapasitashon pa personanan desempleá pa tempu largu. E partisipantenan lo risibí un kurso di preparashon pa nan por subi merkado laboral mihó kapasitá. Pa realisá e proyekto aki FORMA a risibí fondonan di e organisashon USONA.

E proyekto aki yamá “Djump Start” i ta un proyekto dirigí riba personanan sin trabou di entre 25 pa 45 aña di edat. E kurso aki ku lo tin un durashon di seis luna, e partisipantenan lo ser di “coach” den diferente materia manera matemátika, traha presupuesto, komunikashon, kapasidat sosial, aktitut laboral, ritmo laboral, training di solisitut, edukashon di yunan, formashon seksual, konosementu salu, norma i balornan, i abilidat di kòmpiuter. Durante e trayekto un total di 30 persona desempleá lo haña e oportunidat úniko pa partisipá na e trayekto aki.

“E proyekto aki alabes ta fungi komo piloto pa yega na un modelo di trabou entre e diferente organisashonnan ku ta trata ku e mesun grupo di hendenan aki. FORMA ta konvensí ku pa por yuda e grupo aki mester traha konhuntamente ku tur instansia pa asina por sigurá ku e persona ta haña yudansa di tur banda, loke lo garantisá su éksito na final” sigun Inge Berben, direktor di FORMA.

FORMA ta mira bèk riba un dia di introdukshon ku a konta ku 100% di asistensia i kaminda e entusiasmo di e partisipantenan a sobresalí. Esaki ta demostrá ku e grupo aki ta motivá i kier bai e reto aki pa mehorá nan situashon sosial dor di kapasitá nan mes. Pa garantisá e éksito di kada partisipante FORMA a pone un guia personal disponibel pa kada partisipante. E guia lo duna yudansa den e áreanan nesesario pa asina e partisipantenan por konsentrá riba su meta i limitá opstákulonan ku por stroba pa tèrminá e trayekto ku éksito. Na final di e trayekto kada partisipante lo risibí un sertifikado di partisipashon di FORMA i kuater sertifikado di kòmpiuter. Pa hopi di e partisipantenan esaki lo bira e promé biaha den nan bida ku nan por risibí un sertifikado. Esaki ta un oportunidat úniko pa nan por invertí den nan mes. “Nunka ta muchu lat pa nos siña. Kada persona ku invertí den su mes edukashon, ta invertí den su famia i tambe den su isla” sigun Giovanna Frans, representante di DEZA i alabes presidente di Fundashon FORMA.