Rotary ta hasi donashon na departamento di Alfabetisashon di FORMA

Siman pasá Rotary Club Bonaire a sorpresá Fundashon FORMA ku un chèk na balor di 6800 dòler komo muestra di apresio i sosten pa e trabounan ku FORMA ta hasi riba tereno di Alfabetisashon na Boneiru.

E aña akí Rotary Club Bonaire a kuminsá ku un proyekto den kua nan ta sostené tur sorto di trabounan riba tereno di Alfabetisashon di adulto i hubentut riba nos isla. Nan kier duna nan aporte pa inisiativanan lokal riba e tereno aki. Ku e intenshon akí nan a hasi e bunita gesto di entregá un chèk na balor di 6800 dòler pa ku e meta akí. Den añanan anterior tambe Rotary a sostené e departamento di Alfabetisashon di FORMA. E aña akí Rotary kier a duna un empuhe èkstra pa ku e trabounan ku ya ta wòrdu hasí. Rotary a yega na e desishon aki despues di presentashon di FORMA den kual nan a pidi koperashon di Rotary pa ku diferente proyekto interesante.

Rotary Club Bonaire ta konvensí ku e programa di Alfabetisashon tin un benefisio grandi pa e sektor laboral na Boneiru. Esaki dor ku personanan ku anteriormente no por a ehersé nan trabou debí na limitashon den nan edukashon, awor por realisá muchu mas despues di partisipá na un kurso di Alfabetisashon. E personanan aki ta haña mas konfiansa propio i por hasi nan labor mas independiente. Rotary Club Bonaire lo bai aserká kompanianan lokal ku e petishon pa duna nan koperashon dor di manda nan empleadonan ku mester di asistensia den e área aki. Rotary Club Bonaire den futuro lo sigui duna sosten na tipo di programa asina riba nos isla den koperashon ku FORMA.

E aña aki FORMA a logra haña un aporte finansiero pa dos aña serka Ministerio di Edukashon Kultura i Siensia (OCW). Ku e medionan akí FORMA ta bai ekspandé e kantidat di dosentenan ku dos dosente èkstra. Esaki ta amplia e kapasidat di e departamento kaminda lo por bai akapará mas tantu kursista ku anteriormente tabata e kaso.

E aña aki FORMA lo bai lansa un dokumentario kaminda lo mustra dos kursista ku a sigui e proseso di Alfabetisashon i kon nan a desaroyá nan mes. Ta e intenshon pa e oudiensia komprondé ku tur hende por siña lesa i skirbi i ku nunka bo no ta bieu pa kuminsá.

Riba e potrèt ta mira miembronan di Rotary Club Boneiru sr. Herbert Domacasse i sr. Pieter Groenendal hasiendo entrega di e chek na señora Inge Berben direktora di Fundashon FORMA.