Studiantenan di MBO nivel 1 na FORMA si por sigui èksamen i diploma.

Ayera atardi FORMA a risibí e grato notisia for di Inspekshon di Enseñansa ku nan por sigui duna èksamen i diplomanan di MBO nivel 1 na FORMA. E outorisashon akí ta un eksepshon riba e desishon di Inspekshon di Enseñansa pa stòp èksamennan na MBO na Boneiru.

Inspekshon di Enseñansa a tuma e desishon akí basá riba e echo ku FORMA ta traha kaba ku un komishon di èksamen interno ku si ta kumpli ku e eksigensianan di inspekshon. E gerensia di FORMA ta orguyoso ku nan ta konta ku e konfiansa di Inspekshon di Enseñansa tin den nan kalidat di enseñansa i en partikular e èksamennan. Den luna di aprel 2016 inspekshon lo bin hasi un kontròl den e funshonamentu di e komishon di èksamen interno na FORMA.

Durante e situashon di krísis e studiantenan na FORMA a sigui traha riba nan estudio ku motivashon i entusiasmo loke ku ta pone ku no ta bai tin retraso den e prosesonan di estudio. Dia 18 di febrüari próksimo FORMA lo otorgá diploma konforme planifikashon. Studiantenan na FORMA entretantu a wòrdu informá. "Nos ta sumamente preokupá paso nos no sa kiko ta bai pasa ku nos ora nos mester sigui studia na MBO nivel 2", palabranan di un studiante di FORMA preokupá.

Ademas FORMA a bai di akuerdo ku un petishon di direktiva di SGB pa konsehá nan komishon di èksamen den e proseso di mehorashon di nan èksamennan.