Tayer di profeshonalnan den Alfabetisashon

Riba djabièrnè 22 di febrüari 2008 último FORMA a ouspisiá un tayer di profeshonalnan den e area di alfabetisashon. E meta di e tayer tabata pa stipulá e rumbo ku lo sigui ku e departamentu di alfabetisashon na FORMA. Durante e tayer a studia e posibilidatnan di adaptashon i kontinuidat di e departamentu.

E departamentu di Alfabetisashon a start ku su promé kursonan na mart 2006. I te ku awor e departamentu ketu bai ta ofresiendo kursonan den un lokalidat super kómodo i atraktivo pa e kursistanan i dosentenan. Den e periodo di tempu aki FORMA a desaroyá 22 pakete di lès, 5 DVD, 1 CD i mas o menos 500 blachi di pùzel ku ta wòrdu usá komo material pa e diferente materianan. A desaroyá un metodo pa teoria reibeweis spesialmente pa e kursistanan di e departamentu huntu ku diferente ehersisio di idioma i aritmétika.

FORMA tambe ta disponé di mas o menos 70 formulario di investigashon di kursistanan. Aktualmente tin 50 kursista ku ta haña kurso tur siman. E logronan aki tur a wòrdu realisá ku fondonan risibí di e diferente finansiadónan. Pa por a sigui ku e tareanan di e departamentu mester a traha un plan di maneho pa e siguiente kuater añanan. Trahando riba esaki a sali na kla ku tin sierto preokupashon ku mester wòrdu resolvé, pa asina por realisá e metanan stipulá pa e siguiente kuater añanan.

Mester sa:

  • Si un kursista yega un nivel aseptá, ki aktividat(nan) tin komo stimulashon p’e.
  • Ki ora por bisa ku un kursista ta kla, pa loke ta trata siguimentu di kurso.
  • Kon ta sigui monitor e kursistanan ora nan ta kla ku kurso.

Pa traha e puntonan ariba menshoná a trese huntu un tim multidisiplinario ku ta konsistí di dos empleado di S.E.K. kual ta Sra. Ally Pourier i Renata Domacasse, dosentenan di Alfabetisashon kual ta Yùfrou Vilma Albertsz-Emerenciana i Yùfrou Arlene Engelhart, direktor di FORMA Sra. Inge Berben i logopedista Sra. Marie Craane.Tambe tin ideanan i sosten di e ortopedagogo Sra. Erva Etienne i Sr. Pieter de Graaf ku ta trahando riba Alfabetisashon na Hulanda for di 1975. E kordinadó di e departamentu di Alfabetisashon Sra. Xiomara Frans-Muller a presidí e tayer kuminsando ku un diskurso breve dunando algun komparashon entre Boneiru i Hulanda, pa loke ta trata nan struktura di Alfabetisashon.

Despues tabatin e parti di traha den grupo, pa duna kontesta na e tres preguntanan/preokupashonnan básiko, evaluá i por último e kordinadó a duna un resúmen di e konklushonnan. Ta trata di sinku punto ku mester di adaptashon i atenshon inmediato den e departamentu. A base di e resultadonan por konkluí ku e tim mester bolbe reuní pa por bai den detaye riba e tópiko, loke ta bon sigur pa elevá funshonamentu di e departamentu.