Vishon
E departamento di Alfabetisashon ta traha pa prevení i redusí analfabetismo i nivel abou di alfabetisashon riba isla Boneiru. Alabes, e departamento ta duna informashon i konseho na kompania i organisashon tokante komunikashon efektivo ku e grupo akí.
Den kolaborashon ku partnernan di e kadena, FORMA ta traha pa promové akseptashon i emansipashon di hende ku ta tin difikultat pa lesa i skibi. Nos meta ta duna nan e posibilidat pa partisipá na sosiedat i motivá nan pa probechá e oportunidatnan ku ta ser ofresé.
Di e manera aki, e departamento ta kontribuí na un komunidat inklusivo, kaminda kada individuo tin e chèns pa funshoná na su máksimo i kontribuí na sosiedat boneriano.
Mishon
Un hende ku nivel di lesamentu abou ta un individuo ku no ta dominá sufisientemente algun abilidatnan, pa por funshoná independiente den komunidat: mira ora, abilidat básiko di kalkulashon, ekspreshon oral i skibi, kapasidat pa tende i kapasidat pa lesa. Generalmente ta trata di hendenan ku no a kaba ku éksito skol básiko òf skol sekundario.
“Stichting Lezen en Schrijven Bonaire “ tradusí ta Fundashon Lesa i Skirbi Boneiru a hasi un investigashon na 2015 tokante nivel abou di lesamentu riba isla. Segun e investigashon akí, por a konkluí ku 21.8% di e populashon adulto na Boneiru tin nivel abou di lesamentu.
Pa medio di kursonan di alfabetisashon, kada individuo ta risibí e chèns pa desaroyá su mes den Papiamentu den aspekto di:
· lesa
· skirbi
· komprendé idioma papia
· papia
· mira ora
· abilidat di kalkulashon den situashonnan práktiko
E departamento di Alfabetisashon ta sigui desaroyo den situashon boneriano, hulanndes i karibe, ku por tin influensiá riba e manera ku hendenan boneriano ta funshoná, dor di desaroyá pakete di informashon òf módulo spesial pa grupo di analfabeto i hende ku nivel abou di lesamentu. E departamento ta desaroyá tambe kursonan pa hende ku nivel abou di lesamentu, manera: abilidatnan sosial, presupuestá, abilidatnan digital i teoria pa reibeweis.
Aparte di kursonan pa hende ku nivel abou di lesamentu, e departamento ta duna konseho tambe na kompanianan, organisashonnan i instansianan tokante komunikashon ku e grupo akí, pa hasi ku partisipashon di analfabeta i hende ku nivel abou di lesamentu den komunidat por mehorá.
E departamento di Alfabetisashon ta aktivo den tur departamento di FORMA i ta traha huntu ku instansianan pa logra yega na grupo i individuonan. E grupo na ken alfabetisashon ta dirigí ta:
- studiante di MBO i SKJ
- kursistanan eksterno
- kursistanan ku bini for di kompanianan òf organisashonnan
- hende ku ta sin trabou pa un tempu largu
- kliente di integrashon sosial
- personanan detené