FORMA ta ofresé, konforme e lei, hóben entre 18 – 24 aña e oportunidat pa partisipá den trayekto di formashon, edukashon i instrukshon (máksimo 24 luna). Idioma di instrukshon den FORMA ta Papiamentu. E meta ta:
- Haña un kualifikashon inisial pa merkado laboral lokal (diploma MBO1) i/òf;
- Dirigí pa un trabou fiho òf un siguiente estudio;
- Mantené un trabou i kaba ku un siguiente estudio;
- Pa partisipante pa ken e meta menshoná ariba no ta posibel (problemátika LVB), ta duna un entrenamentu di outonomia den korespondensia ku partnernan di e kadena.
Mi Formashon / Arbeidstoeleiding (Mi-Fo/ATL)
E trayekto akí ta dirigí riba studiante ku ta bini di PRO, òf studiante (18+) ku a sali for di edukashon regular i no ta kla pa sigui un MBO Entree nivel 1. Pa prepará nan pa e trayekto prinsipal, studiante ta sigui un trayekto básiko di 10 luna (un aña eskolar). Nan ta presente na FORMA 2 dia pa siman i 1 dia pa siman nan ta bai un lugá pa un stazje sosial. E kuríkulo ta wòrdu ahustá kontinuamente na e demanda di komunidat i e nesesidatnan di e grupo.
Den e trayekto básiko aki, ku un (EVW’er ) trahadó edukativo i di formashon/guia edukativo di formashon, ta guia e grupo, tin lugá pa máksimo 15 studiante. E trayekto Mi-Fo/ATL ta un trayekto di formashon ku ta dirigí tantu na desaroyo personal komo profeshonal di hubentut. Dor di portfolio-orientashon i tarea ku ta relashoná ku kompetensianan di programa Kaminda pa Trabou, studiante ta deskubrí ken e ta, ki talento i kalidatnan e tin, di unda e interesnan ta, e ta desaroyá struktura di dia i ritmo di dia/anochi, i e ta siña kon pa siña. Di e manera aki hubentut ta haña konosementu propio, sabiduria i un bista realista riba futuro.
Long Life Learning (LLL)
Den e último añanan, mas studiante ku ta bini di skol spesial (VSO) i klientenan di Fundashon Kuido pa Hende Desabilitá (FKPD) a registrá na FORMA pa formashon i edukashon. E studiantenan aki tin limitashon intelektual leve (LVB) ku un IQ promedio entre 50 i 70. Pa motibu di nan limitashon kognitivo, nan tin difikultat pa sigui un MBO Entree di inmediato i nan ta dependiente di otro hende, pasobra nan no por funshoná sufisientemente independiente den diferente aspekto di bida. E trayekto LLL ta siña e grupo aki abilidatnan práktiko, sosial i kognitivo. Nan ta bai skol 1 dia pa siman, i e otro dianan, nan ta traha na nan trabou òf na un lugá di aktividat. Despues di e trayekto, nos ta evaluá si e studiante ta kla pa sigui na un trayekto pa deklarashon MBO.