FORMA ta un sentro di formashon pa edukashon i enseñansa di adulto ku e meta pa duna adulto un oportunidat pa edukashon, formashon i/òf enseñansa, pa asina nan por tuma un lugá balioso den e merkado laboral.
FORMA ta konsistí di 4 departamento:
- Departamento Alfabetisashon
- Departamento Trayekto Sosial pa Hóben (SKJ)
- Departamento Edukashon Sekundario Vokashonal (MBO)
- Departamento Kursunan
E Mishon:
“Duna adulto i hóben, i asina tambe e generashon futuro, un oportunidat pa desaroyá nan mes pa nan por funshoná na e máksimo den merkado laboral i den sosiedat, semper teniendo na kuenta i antisipando riba e eksigensianan ku e sosiedat ta pone. Ademas, informá i duna konseho na organisashonnan, instansianan i gobernashon tokante e situashon di e grupo di enfoke.”
FORMA ke funshoná tambe komo un órgano di konseho ora ta trata di kuestionnan relashoná ku e grupo di enfoke di FORMA. FORMA ta traha tur dia ku esaki i konosé nan mihó ku ningun otro. E informashon i konosementu ku ta wòrdu hañá di e grupo di enfoke ta un fuente kaminda otro organisashon por saka. FORMA ke hunga un ròl aktivo i konsehero den instansianan ku ta tuma desishon di polítika ora ta trata di nan.
Den Karibe Hulandes FORMA tin un posishon privilegiá, pasobra FORMA tin e mayor eksperensia i ekspertisio den e área di edukashon pa adulto. FORMA ke posishoná su mes pa yuda otro organisashon den Karibe Hulandes i den e region ku desaroyo di oferta pa e grupo akí.
FORMA ke logra ku kada partisipante despues di kompletá un trayekto edukativo, di formashon i di preparashon tin un perspektiva personal kaminda e:
- tin sufisiente abilidatnan komunikativo i sosial;
- tin un aktitut positivamente orientá riba trabou;
- ta outosufisiente i kapas pa pensa den manera di solushon di problema;
- ta profeshonalmente kapasitá.
FORMA ta sali for di e prinsipio ku kada individuo tin kapasidat pa desaroyá su mes via aktividatnan di formashon, enseñansa i guia pa bira un individuo outosufisiente den nos komunidat. E organisashon ta pone e individuo sentral i ta krea e kondishonnan nesesario pa pone tur hende na posishon pa e por sigui enseñansa i asina kompletá un trayekto di formashon, di kurso òf di trabou. Krea posibilidatnan pa desaroyo tin tambe un efekto riba nos generashon futuro ora ku e partisipante ta para stabil den bida. Den esei, e partisipante ta kapas pa krea un ambiente stabil pa su yu, kaminda nan por krese den seguridat i por partisipá den komunidat.
E Vishon
E metanan ku FORMA ke logra, e ke alkansá pa medio di:
- ta sigurá ku e kondishonnan básiko ta presente, pa pone hende na e posishon pa por partisipá den enseñansa òf formashon;
- ta ofresé trayektonan di formashon básiko adaptá, pa ku partisipantenan por dominá e abilidatnan nesesario pa por partisipá den enseñansa;
- ta ofresé formashon i trayektonan di trabou i skol pa prepará e partisipante bon pa merkado laboral;
- ta forma relashon di kolaborashon ku partnernan sosial i komersial pa krea mas posibilidatnan pa desaroyo di partisipantenan;
- ta ofresé entrenamentu, kursonan i programa di enseñansa adaptá, koordiná ku e demanda di sektor di komersio na Boneiru;
- ta ofresé servisio na organisashon kolega den region;
- ta duna konseho tokante kuestion nan di kontenido;
- ta evaluá i implementá métodonan i partí eksperensia riba e área di e grupo di enfoke ku instansianan den region;
- ta informá komunidat den benefisio di e grupo di enfoke;
- ta konsehá instansianan gubernamental, finansiadonan, polítiko i legislador nan ora ta trata di kuestionnan riba e grupo di enfoke.
E Grupo di Enfoke
FORMA ta ofresé enseñansa na adulto ku na un manera òf otro no a haña oportunidat pa haña enseñansa i/o a kai den situashonnan di bida ku a hasi difísil pa nan kompletá enseñansa. Ademas, FORMA ta ofresé kurso pa adulto ku ta aktivo kaba den merkado di trabou i ke sigui desaroyá nan mes.
FORMA ta dirigí su mes na 4 grupo di enfoke diferente:
- analfabetanan i hende ku nivel abou di alfabetisashon
- hóben sin kualifikashon inisial (18 te 24 aña)
- hende ku ta sin trabou pa un tempu largu
- poblashon laboral ku ta traha kaba
E konsepto di guia
Kada partisipante ta risibí, kaminda ta nesesario, guia personal pa huntu ku e partisipante kita for di kaminda e faktornan ku ta krea bareranan, na un manera práktiko. E yudansa akí ta konsistí di guia sikososhal, yudansa práktiko, sosten den kuido di mucha i transporte. Ora ku un problemátika serio ta wòrdu detektá, por referí e partisipante na yudansa spesialisá, por ehèmpel: un trahadó sosial (interno di FORMA), un sikiatra òf un sikólogo (eksterno), kuido kontra adikshon, sikiatria òf otro spesialidat.
Partisipantenan entre 18 te 24 aña por hasi uso di e servisio di Expertise Center Onderwijs Zorg (EOZ), un aliansa insular ku ta dediká na duna sosten den kasonan di difikultat den estudio òf nesesidatnan di estudio spesífiko.
Enseñansa i struktura
E sentro di formashon FORMA ta ofresé formashonnan pa tempu kompleto (voltijd) i pa tempu parsial (deeltijd) den e siguiente área :
- Alfabetisashon
- Trayekto Sosial pa Hóben / Trayekto di formashon sosial pa hóben (SKJ)
- Edukashon sekundario di vokashon (MBO nivel 1)
- Kursonan di vokashon i kursonan di idioma (den kolaborashon ku i segun petishon di otro instansia)
E diseño di e trayektonan akí, i trayektonan futuro, ta tuma lugá den konsulta ku Scholengemeenschap Bonaire (SGB) i merkado laboral na Boneiru, pa asina un transishon ku ta flui keda posibel.
Debí na e struktura estatal ku ta den transformashon, FORMA ta tene konsulta ku Openbaar Lichaam Bonaire (OLB) i ku ministerionan di:
- Enseñansa, Kultura i Siensia (OCW)
- Asuntunan Sosial i Empleo (SZW)
- Sentro Akseso (AKSESO).