Dia 16 di aprel 1992 Henry Toré, John Goeloe (†), Mary Tjin-A-Sjoe (†) , Ursa Thielman, Henny Thielman i Sixto (Don Henry) Josefa (†)a akudí na ofisina di notario Alfred Paul Knuf pa lanta Fundashon Forman pa Mañan.
Meta:
1. E meta di e fundashon ta promové edukashon, enseñansa i formashon en general;
2. E fundashon ta intentá na logra su meta pa medio di implementá i mehorá kursonan i estudionan i tur lo ke tin relashon ku esakinan den e sentido mas ámplio di e palabra
Un dia Henry Toré e aserká Toontje Nicolaas (†), ámbos salí for di sektor di enseñansa, ku e petishon pa e bira direktor di un instituto di formashon ku nan kier a lanta; Fundashon FORMA – Formashon pa mañan.
Nèt Nicolaas a kaba organisá Regata Internashonal di Boneiru, poné na disposishon dor di gobièrnu. E tabata riba ‘payroll’ di gobièrnu di Boneiru, ku a bai di akuerdo pa e bai traha na FORMA komo koordinadó.
“Mi ta kòrda kla ainda kon Toré a bini serka mi pa bisa ku nan ta lantando un fundashon di enseñansa i formashon. El a bisa sinembargo ku nan no tin nada ainda i ku ta mi mester lanta e instituto akí for di tera. Nos a kuminsá sin niun sèn pretu”, Toontje a bisa den e programa ‘Boneiru, Ayera pa Awe’.
A logra haña un lokal den e edifisio di hòspital bieu na Playa. “Mester a hasi hopi esfuerso pa limpia e edifisio akí, ku tabata hopi sushi. Basta kilo di stòf a saka for di e edifisio. Henry Toré mes a sòru pa lèsernar i stul”, Toontje Nicolaas a bisa.
E promé kurso ku a organisá tabata pa siña fèrf. Ruman di Toontje, Benjamin Nicolaas (De Maan Schilderwerken) a duna e kurso. Mesora nan a bira man tambe fèrf parti di e edifisio den uso dor di FORMA.
Despues a sigui kursonan di transporte públiko pa taksista i shòfùrnan di outobùs. TCB su funshonarinan tabata duna e kurso akí. Tambe a bini ku un kurso di “Basiskennis Boekhouden”.
“Mi so a kuminsá, pues kordinadó i empleado. Mi mes tabata hefe di mi mes. Despues a bini Rita Henar, kende tabata traha na SGB komo dosente. Nos a pensa un manera kreativo pa e keda riba ‘pay-roll’ di SGB, pero trahando pa FORMA. E di tres empleado di FORMA tabata Frenk Goeloe.”
Toontje Nicolaas a keda direktor di FORMA di 1992 te na aña 2000.
Relato kortiko di eks directora Sra. Inge Berben
Fundashon FORMA a hala atenshon di nos èks direktor, sra Inge Berben. El a mira e oportunidat kon por kombiná kuido ku komunikashon, formashon i enseñansa. E tabata di opinion ku e konsepto aki, tur e faktornan ku tur e faktornan akí, e kuido i e enseñansa huntu, por sòru ku hende ta subi riba e límite di pobresa, pues realmente sali for di pobresa. Esei el a haña asina atraktivo ku dia e funshon a habri, el a solisitá. Sra Inge a realsá ku pa e grupo di enfoke di FORMA, ensñansa so no ta sufisiente. Pues ta importante ku banda di esaki, por risibí kuido I formashon, paso e distansia for di merkado laboral ta basta leu.
Inge Berben tabata direktor di FORMA di 2007 te na aña 2019.
